Alfredo D. Merilos (Ka Bendoy)

56, March 24, 1962 - March 15, 2018

Si Alfredo Dino Merilos, kilala bilang Ka Bendoy o Ka Berdin, ay isang dedikadong rebolusyonaryo mula sa Bicol na nag-alay ng mga dekada ng kanyang buhay sa pagsusulong ng digmang bayan at pagtataguyod ng mga karapatan ng mamamayan. Ipinanganak at lumaki siya sa panahon ng Batas Militar, kaya naging aktibo siya sa aktibismo mula pa noong siya ay hayskul at lalo pang naging aktibo kahit nong siya ay nag-aral ng Mechanical Engineering sa Bicol University.

Sa halip na magtrabaho sa mga komportableng upisina matapos grumadweyt, pinili niyang maging organisador sa mga paaralan at komunidad, at noong 1985 ay naging pulang mandirigma sa kanayunan. Sa kabila ng mga pagsubok, naging mahusay siyang lider at kadre, na naging bahagi ng Pangrehiyong Kagawaran sa Instruksyon at gumawa ng mga makabuluhang publikasyon tulad ng komiks na “Batoy” upang maipaliwanag ang mga ideya ng Partido.

Mula 1991 hanggang 2012, pinangunahan niya ang iba't ibang yunit ng Partido sa Bicol, nagsilbing Kalihim ng Larangan, Kalihim ng Komiteng Prubinsya, at naging regular na kagawad ng Komiteng Rehiyon at Komite Sentral ng Partido. Kilala siya sa kanyang malawak na karanasan, matatag na pamumuno, at pagiging guro ng mga bagong kadre.

Sa kabila ng kanyang mahirap na kalusugan—mild stroke, diabetes, hypertension, at pumapalyang puso—pinili niyang ipagpatuloy ang paglilingkod sa masa. Ngunit sa kabila ng kanyang dedikasyon, pinaslang siya ng mga alagad ng kamatayan ng estado sa edad na 56. Ang kanyang buhay at sakripisyo ay naging inspirasyon sa mga rebolusyonaryo at mamamayang Pilipino na patuloy na naglalayong itaguyod ang hustisya at kalayaan.